Enn ein hryssan fyrir barðinu á dýraníðingi

21.10.2011 - 07:40
Enn ein hryssan varð fyrir barðinu á níðingi eða níðingum fyrr í vikunni er hún reyndist vera með djúpan skurð í leggöngum og annan minni á ytri kynfærum, þegar ódæðið komst upp. Málið var kært til lögreglunnar á höfuðborgarsvæðinu síðdegis í gær.
Er þetta fjórða níðingsmálið sem kært er til lögreglu á undanförnum mánuðum.

Hryssan er ásamt fleiri hrossum í hesthúsi í nýja hesthúsahverfinu á Kjóavöllum í Kópavogi. Eigendur hesthússins sjá sjálfir um hirðingu hrossanna á kvöldin en fá annan aðila til að sjá um morgungjafir eins og tíðkast. Þegar hryssan var sett út á þriðjudagskvöld og hún fór að hreyfa sig reyndist blóð leka aftur úr henni. Katrín Harðardóttir, dýralæknir á Dýraspítalanum í Víðidal, var þegar kölluð til og hefur hún annast hryssuna síðan.

„Hún var mjög aum og fann auðsjáanlega mikið til,“ segir Katrín um aðkomuna og lýsir áverkunum með ofangreindum hætti. Hún segir allt benda til þess að áverkarnir hafi verið af mannavöldum. Annar dýralæknir hefur einnig staðfest það eftir að hafa skoðað hryssuna.

Eigendur hesthússins segja að þeir hafi falið varalykil að hesthúsinu, sem er nýtt og á að vera óaðgengilegt ókunnugum, utandyra. Telja megi fullvíst að sá eða þeir sem stóðu að misþyrmingunum á hryssunni hafi vaktað mannaferðir í húsið og látið til skarar skríða aðfaranótt þriðjudagsins. Fleiri hross hafi verið í húsinu, þar á meðal einar sjö hryssur en þær séu allar frekar lítið tamdar eða styggar og varist að maðurinn komist nærri þeim. Sú sem fyrir misþyrmingunum varð er hins vegar spök og þæg í umgengni.

Eigendurnir vilja brýna fyrir hesteigendum að læsa vel hesthúsum sínum, skipta um skrá ef lyklar hafa farið á flæking, geyma ekki varalykla utandyra og vera vel á verði verði sjái þeir til grunsamlegra mannaferða í hesthúsahverfunum. Þá sýni reynslan að full þörf sé á því fyrir hestamenn að huga að hrossum sínum í haga.

jss@frettabladid.is