Á fimmtudaginn 28 febrúar kl. 19:00 fer fram þriðja mótið í mótaröð Meistaradeildar í hestaíþróttum, í Ölfushöllinni, Ingólfshvoli, en þá verður keppt í fimmgangi.

 

Forsala aðgöngumiða er hafin og er um að gera að tryggja sér miða í tíma.  Miðasala fer einnig fram að venju í Ölfushöllinni á keppnisdegi.

Í fyrra sigraði John Kristinn Sigurjónsson, Hrímni/Export hestar, fimmganginn á Konsert frá Korpu, eftir æsispennandi keppni þar sem þeir komu upp sem sigurvegarar úr B-úrslitum og riðu sig upp í fyrsta sætið í A-úrslitum.  Í öðru sæti í fyrra varð liðsfélagi John Kristins, Viðar Ingólfsson, á Má frá feti og jöfn í þriðja sæti urðu svo Artemisia Bertus, Hrímni/Export hestar, á Sólbjarti frá Flekkudal og Elvar Þormarsson, Spónn/Netvistun, á Skugga frá Strandarhjáleigu.

Það verður spennandi að sjá hvaða hestar mæta í Ölfushöllina næstkomandi fimmtudag og ljóst nú þegar að keppnin verður bæði spennandi og hörð.

Staðan í stigakeppni einstaklinga eftir fyrstu tvö mótin er jöfn og spennandi.  Guðmundur Björgvinsson og Sigurður Sigurðarsson eru hnífjafnir í 1-2 sæti með 20 stig hvor.  Eyjólfur Þorsteinssong og Olil Amble eru einnig hnífjöfn í 3-4 sæti með 12 stig.

Staðan í stigakeppni liðanna er ekki síður spennandi en þar leiðir lið Lýsis með 113 stig, Top Reitir/Ármót liðið er með 105,5 stig,  Hestvit/Árbakki með 86 stig og Gangmyllan með 79,5 stig.

Hægt er að skoða stöðuna nánar í stigakeppninni inná vef Meistaradeildarinnar, www.meistaradeild.is, undir "staðan".

Hvetjum alla til að mæta í Ölfushöllina, upplifa stemminguna og sjá úrval af bestu hestum og knöpum landsins reyna fyrir sér í fimmganginum.