Skeifudagurinn 2019

16.04.2019 - 16:15
 Hestamannafélagið Grani á Hvanneyri býður til sannkallaðrar veislu á Sumardaginn fyrsta, 25. apríl nk, á Mið-Fossum í Borgarfirði. Þann dag verður Skeifudagurinn haldinn hátíðlegur í sextugasta og þriðja skipti. 
 
Hátíðin hefst í hestamiðstöðinni Mið-Fossum kl 13.00 og eru allir velkomnir að líta við og fylgjast með dagskrá. Nemendur sýna afrakstur vetrarins og velvalin sýngaratriði í boði. Að henni lokinni verður kaffisala í Ásgarði á Hvanneyri og hið vinsæla folatollahappdrætti þar sem vinningar eru gjafabréf fyrir handhafa að leiða hryssu sína undir hina ýmsu stóðhesta og búa til framtíðargæðinga.
 
Upphaf Skeifudagsins má rekja til stofnunar Hestamannfélagsins Grana á Hvanneyri árið 1954 en það var Gunnar Bjarnason, þáverandi kennari við skólann, sem stofnaði félagið ásamt nemendum við Bændaskólann á Hvanneyri, sem áhuga höfðu á hestamennsku. Gunnar var upphafsmaður kennslu í reiðmennsku og tamningum við skólann árið 1951. Mikill áhugi var meðal nemenda á þessháttar námi þó að aðstaða og húsakynni hefðu ekki verið upp á marga fiska í upphafi. 
Síðan hefur mikið vatn runnið til sjávar og í dag hafa nemendur LbhÍ og Grani aðgang að frábærri aðstöðu að Mið-Fossum í Andakíl. Allir nemendur Landbúnaðarháskólans hverju sinni eru fullgildir meðlimir hestamannafélagsins Grana. Félagið stendur reglulega fyrir margskonar viðburðum yfir skólaárið jafnt fyrir hestaunnendur sem og aðra. Sem dæmi má nefna, árlega óvissuferð og hefðbundin hestaíþróttamót auk Skeifudagsins. 
 
Skeifudagurinn er uppskeruhátíð nemenda í reiðmennskuáföngum skólans þar sem veitt eru mörg verðlaun. Má nefna Gunnarsbikarinn, sem fer til þess nemenda sem fær hæstu einkunn í fjórgangskeppni, ásetuverðlaun Félags Tamningamanna og Morgunblaðskeifuna. Hana hlýtur sá nemandi sem fær hæstu meðaleinkunn úr verklegum reiðmennskuprófum. Morgunblaðsskeifan hefur verið veitt árlega síðan 1957. Mikill heiður þykir að hljóta Skeifuna og hafa sumir handhafar hennar seinna meir orðið einhverjir ástsælustu hestamenn þjóðarinnar.
 
frétt/mynd/facebooksíða skeifudagsins