Frábær hestakostur á Ræktun 2015

Sýningin hefst kl. 20:00 á laugardagskvöld

22.04.2016 - 11:21
Nú er Ræktun 2016 að bresta á. Mikið af frábærum gæðingum eru búnir að tilkynna komu sína og lítur dagskráin mjög vel út. 
 
Meðal atriða eru afkvæmi Hákons frá Ragnheiðarstöðum, afkomendur Orku frá Hvolsvelli og systkynin undan Glóð frá Grjóteyri og Þá verða fulltrúar frá ræktunarbúunum Hamarsey,Oddsstöðum,Hestheimum og 
Litla Landi.
 
Tveir glæsilegir fulltrúar frá Strandarhöfði mæta á staðinn ásamt glæsihrossunum Völsung frá Skeiðvöllum og Ólínu frá Skeiðvöllum,Krókus frá Dalbæ sýnir okkur af hverju hann hlaut 10 fyrir skeið, Glæsihryssurnar Pixi frá Mið Fossum og Sif frá Helgastöðum leika listir sínar og svo mæta 2 einstaklingar sem hlotið hafa 10 fyrir tölt.
 
Sunnlendingar eiga líka einstaklega góð og efnileg klárhross sem og alhliðahross sem munu kynna sig á Ræktun og má nefna frábæra gripi frá Varmá og Borg.Af öðrum atriðum má nefna að Fákskrakkar leika listir sýnar og nemendur Hólaskóla koma fram. 
 
Hlaðborðið í Fákaseli opnar kl 18.00 með veislumat að venju. 
 
Miðasala fer mjög vel af stað og stefnir í frábæra stemningu í Fákaseli annað kvöld. 
 
Sýningin hefst kl. 20:00 á laugardagskvöld og fer forsala miða fram í Baldvin og Þorvaldi, Fákaseli, Top Reiter og Líflandi. Einnig er miðasala við innganginn. 
 
Tilvalið að skella sér á frábæra sýningu á mörgu af því besta sem sunnlenskir hestamenn hafa uppá að bjóða.
 
Miðaverð er kr. 2.500, frítt fyrir 12 ára og yngri.
 
 
 
Forsala á Ræktun 2016 að hefjast
 
Nú er forsala að hefjast fyrir stórsýningu Hrossaræktarsamtaka suðurlands Ræktun 2016 sem verður haldin í Fákaseli laugardaginn 23. apríl kl. 20.
Forsalan fer fram í verslun Top Reiter í Ögurhvarfi, Fákaseli og hjá Baldvin og Þorvaldi á Selfossi.
Síðustu ár hefur verið þétt setið á pöllunum og því vissara að vera snemma á ferðinni og tryggja sér miða í tíma því nú stefnir  í mjög glæsilega sýningu og hafa margir af allra bestu gæðingum landsins boðað komu sína.
 
 
Miðaverð er kr. 2.500, frítt fyrir 12 ára og yngri.