Landslið Íslands í hestaíþróttum þakkar stuðninginn

24.04.2019 - 13:41
 Fjáröflunarviðburður landsliðs Íslands í hestaíþróttum, „Þeir allra sterkustu” var haldinn í TM-reiðhöllinni í Víðidal um páskahelgina. Sýningin heppnaðist vel í alla staði og var höllin full út úr dyrum. Fjáröflunin sló öll met og safnaðist vel á áttundu milljón króna fyrir landsliðið okkar.
 
 
Landssamband hestamannafélaga og landsliðsnefnd LH vilja koma á framfæri innilegu þakklæti til allra sem að mótinu komu. Ber þar að nefna styrktaraðila, eigendur stóðhesta sem gáfu tolla í stóðhestaveltuna, landsliðsknapa og aðra knapa sem fram komu á sýningunni, dómara, þuli, kokkana sem sáu um lambaveisluna og aðra sem gáfu vinnu sína, alla sem gáfu vinninga í happdrættið og sérstakar þakkir fær Hestamannafélagið Fákur sem lánaði aðstöðu sína endurgjaldslaust.
 
Stuðningur ykkar gefur landsliðinu okkar veganesti fyrir heimsmeistaramótið í Berlín í sumar og er mikilvægur fyrir framtíðaruppbyggingu afreksmála LH í hestaíþróttum.
 
frétt/lhhestar.is